पोखरा । नेपाली कांग्रेस स्थानीय निर्वाचन केन्द्रित भएको छ। ‘घरघर जाऔं, कांग्रेस बिताऔं’ अभियानअन्तर्गत गण्डकी प्रदेश समितिले निर्वाचन क्षेत्र स्तरमा प्रतिनिधि खटाएको छ। गण्डकीका ११ वटै जिल्लाका ३६ निर्वाचन क्षेत्रमा प्रतिनिधि खटाइएको हो। उनीहरूलाई प्रशिक्षण र सामग्रीसमेत दिएर पठाइएको सभापति शुक्रराज शर्माले बताए।
प्रत्येक निर्वाचन क्षेत्रमा २ जनाका दरले प्रतिनिधि पठाएको उनले बताए ।प्रतिनिधिले चैत ५ देखि १५ सम्म आफ्नो क्षेत्रमा पुगेर निर्वाचन केन्द्रित प्रतिवेदन बुझाउनु पर्ने छ। प्रदेश समितिका सदस्यहरूलाई जिम्मेवारी दिएर पठाइएको हो । शर्माले पार्टीको सिद्धान्त, नीति र विचारलाई पार्टीको तल्लो तहसम्म पुर्याउन प्रतिनिधि खटाइएको बताए।
‘जनस्तरमा परिवर्तित कांग्रेसलाई पुर्याउनु छ। प्रतिनिधिहरूले नागरिकलाई प्रत्यक्ष भेटेर कांग्रेसका बारेमा भन्नुहुन्छ,’ उनले भने, ‘त्यसपछि तयार भएको प्रतिवेदनका आधारमा कांग्रेसले अगाडिको रणनीति तयार गर्छौं।’
प्रतिनिधिहरूले एमसीसीबारे भ्रम चिर्ने महामन्त्री विष्णुप्रसाद लामिछानेले बताए। ‘एमसीसी नेकपा एमालेका पालामा दर्ता भएको हो। कांग्रेस सत्तामा हुँदा वा नहुँदा जनतामाझ एउटै कुरा गर्छ। कम्युनिष्टका जस्तो रंग फेर्दैन,’ उनले भने, ‘राष्ट्रहितका पक्षमा भएकाले विरोधमा उत्रिएकालाई पनि साथ लिएर पास गरेको हो।
संसद्मा छिराएपछि त्यहीँबाट टुंगो लगाउनुपर्थ्यो। अन्तत लगायो।’ जनमानसमा परेको भ्रमबारे प्रतिनिधिले स्पष्ट पार्ने उनको भनाई छ।
