दमक / कञ्चनपुरको कृष्णपुर नगरपालिका–१ निगालीमा छाउगोठमा सुतिरहेकी २८ वर्षीया कमला आउजीको सर्पको डसाइबाट ज्यान गएको छ। उनलाई असार २८ गते राति करिब १२:३० बजे सर्पले बायाँ गालामा डसेको थियो। गम्भीर घाइते अवस्थामै सेती प्रादेशिक अस्पताल, धनगढी लगिएकी आउजीको उपचारका क्रममा शनिबार साँझ मृत्यु भएको हो।

भारतमा रहेका श्रीमान् नहुँदा कमला आउजी तीन सन्तानसहित घरमै बस्दै आएकी थिइन्। प्रारम्भमा घरमै सर्पले डसेको भनिए पनि महिनावारी अवस्थामा छाउगोठमा सुत्दा घटना भएको पुष्टि भएको प्रहरीले जनाएको छ। सुदूरपश्चिममा छाउपडी प्रथाविरुद्ध अभियान जारी रहे पनि अझै परम्परा हट्न सकेको छैन।