दमक /  सुनसरीको धरानस्थित कोशी राजमार्गमा चेकजाँच गर्ने क्रममा प्रहरीले झन्डै ५० किलो लागू औषध गाँजा बरामद गरेको छ। विहीबार साँझ ५:४५ बजे धनकुटाबाट धरानतर्फ आउँदै गरेको यात्रुवाहक बसमा चेकजाँच गर्दा उक्त परिमाणमा गाँजा फेला परेको जिल्ला प्रहरी कार्यालय सुनसरीले जनाएको छ।

अस्थायी प्रहरी चौकी अमरहाटबाट खटिएको प्रहरी टोलीले बा.प्र.०१–००६ ख ६२६८ नम्बरको यात्रुबाहक बस को डिक्की जाँच गर्दा दुईवटा सुटकेसभित्र ४९.७२५ किलो गाँजा फेला परेको हो। गाँजा लुकाएर राखिएको उक्त सुटकेसको सम्बन्धमा बसमा सवार यात्रुहरूलाई सोधपुछ गरिएको थियो।

अनुसन्धानका क्रममा ती सुटकेसहरू भोजपुर जिल्ला, पौवादुम्मा गाउँपालिका–६ का ३६ वर्षीय जीवनराज राई र ३१ वर्षीय आरएन राई को  भएको खुलेको प्रहरीले जनाएको छ। दुबै व्यक्तिलाई गाँजासहित नियन्त्रणमा लिई इलाका प्रहरी कार्यालय धरानमा ल्याएर थप अनुसन्धान भइरहेको जिल्ला प्रहरी कार्यालय सुनसरीका अधिकारीहरूले जानकारी दिएका छन्।