बारा — बारा जिल्लाको कलैया उपमहानगरपालिका–१४ बघवनमा जेठ २९ गते भएको कुटपिट घटनाले एक व्यक्तिको ज्यान गएपछि पाँच जनालाई प्रहरीले पक्राउ गरेको छ। बारा प्रहरीले घटनासँग सम्बन्धित मुख्य आरोपीसहित एकै परिवारका चार जनालाई नियन्त्रणमा लिएको हो।
घटनामा ५० वर्षीय नन्दु राउत कुर्मीमाथि सार्वजनिक स्थानमा क्रूर रूपमा आक्रमण भएको थियो। प्रहरीका अनुसार उनीमाथि बघवनस्थित एक राइस मिल अगाडि कुटपिट भएको थियो। गम्भीर घाइते अवस्थामा अस्पताल भर्ना गरिएका कुर्मीको उपचारका क्रममा निधन भएको हो।
प्रहरी अनुसन्धानका क्रममा घटनामा संलग्न रहेको अभियोगमा बघवनकै ३८ वर्षीय उमेश जयसवाल, उनकी श्रीमती ३५ वर्षीया रञ्जुदेवी, २० वर्षीय छोरा सुमित र १८ वर्षीय छोरा सुजितलाई पक्राउ गरिएको छ। घटनामा संलग्न रहेको आरोपमा उनीहरूका नातेदार ३४ वर्षीय दिगम्बर प्रसाद जयसवाललाई समेत नियन्त्रणमा लिइएको छ।
प्रहरीले मुख्य अभियुक्त उमेश जयसवाललाई बिश्रामपुर गाउँपालिकाबाट पक्राउ गरेको हो भने अन्य चार जनालाई फरक-फरक स्थानबाट नियन्त्रणमा लिएको हो। मृतक नन्दु कुर्मीका छोरा दीपेन्द्र पटेलले ६ जनाविरुद्ध किटानी जाहेरी दिएका थिए, जसअनुसार अनुसन्धान अघि बढाइएको प्रहरीले जनाएको छ।
