जाजरकोट : सरकारको प्रतिबन्धमा रहेको नेत्रविक्रम चन्द विप्लवले नेतृत्व गरेको समूहका पक्राउ परेका कार्यकर्ता पार्टी छोड्ने कागज गर्दै धमाधम छुट्न थालेका छन्। प्रहरीले पनि पाटी छोड्ने लिखित कागज गर्ने विप्लवका कार्यकर्तालाई हिरासतमुक्त गर्दै आएको छ।
हालसम्म जाजरकोटमा पक्राउ परेकामध्ये तीन जनाले विप्लव समूह छोड्ने लिखित गरेका छन्।
सरकारले गत चैत अन्तिममा प्रतिबन्ध लगाउनु अघि विप्लवसमूहमा सक्रिय रहेकालाई प्रतिबन्धपछि पनि विभिन्न गैरकानूनी क्रियाकलापमा संलग्न भएको भन्दै प्रहरीले पक्राउ गर्दै आएको छ। उनीहरू पक्राउ परेपछि कम्तीमा दुई हप्ता हिरासत बसेर विप्लव समूह छाड्ने कागज गर्दै रिहा हुने गरेका छन्।
विप्लवका कार्यकर्ता छुटाउन नेपाली कांग्रेसका नेताको ठूलो दौडधुप हुने गरेको छ। विप्लव समूहका डोल्पा इञ्चार्ज भन्दै पक्राउ परेका वीरबहादुर खड्का पाटी छोड्ने कागज गरेर रिहा भएका थिए। त्यस्तै छेडागाड इञ्चार्ज कैलास पुन, भेरी ब्यूरो सदस्य हरिचन्द्र जैसीलगायतका नेता तथा कार्यकर्ता कागज गर्दै रिहा भएका हुन्।
विप्लव समूहको गैरकानूनी क्रियाकलापमा संलग्न नहुने र संविधान मान्ने भन्ने उल्लेख गरी उनीहरू छुटेका छन्। त्यस्तै भेरी ब्यूरो सदस्य जैसीले सत्तारुढ दल (नेकपा)मा प्रवेश नै गरेका छन्। अखिल क्रान्तिकारीका केन्द्रीय सदस्य प्रेम शाहीलाई काठमाडौंमा पक्राउ परेलगत्तै जाजरकोट पुर्याइएको थियो।
पक्राउपछि शुक्रबार स्वतन्त्र जीवनयापन गरी बस्ने भनी रिहा हुने मौखिक सहमति भए पनि अन्तिम चरणमा आइपुग्दा नेपाल कम्युनिष्ट पाटीसँग आस्था राखे पनि गैरकानूनी क्रियाकलाप नगर्ने भन्ने वाक्यमा कुरा नमिल्दा रिहा हुन सकेनन्।
अन्य अहिले दुई जना विप्लव कार्यकर्तासमेत हिरासतमै रहेका छन्। कागज गरेर छुटेलगत्तै विप्लव समूहका कार्यकर्ता के गरिरहेका छन् भन्ने कुरा सुक्ष्म अनुगमन भइरहेको प्रहरी प्रमुख श्याम खत्रीले जानकारी दिए।
