नेत्रपविक्रम चन्द विप्लव नेतृत्वको नेपाल कम्युनिस्ट पार्टीका मेची–कोशी ब्यूरो सदस्य तथा मोरङ जिल्ला इन्चार्ज उदय राई (उगेन) सत्तारुढ नेपाल कम्युनिस्ट पार्टी (नेकपा) मा प्रवेश गरेका छन् ।
उनलाई सोमबार बिहान अध्यक्ष पुष्पकमल दाहाल प्रचण्डले आफ्नो निवास खुमलटारमा आयोजित कार्यक्रमकाबीच पार्टीमा प्रवेश गराएका हुन् ।
सो अवसरमा बोल्दै अध्यक्ष प्रचण्डले देशको समृद्धि र विकासको निर्विकल्प पार्टी नेकपा भएकाले देशभक्त, राष्ट्रवादी र प्रगतिशील शक्तिहरुको मूलप्रवाहमा समाहित भई राष्ट्र निर्माणमा जुट्नु पर्ने बताए ।
नवप्रवेशी राईले विप्लव नेतृत्वको नेकपाले गरेका अराजक गतिविधिहरु प्रतिगामी, यथास्थितिवादी शक्ति र प्रवृत्तिलाई मलजल गर्ने भएको बताउँदै समृद्ध र समानतासहितको वैज्ञानिक समाजवादी व्यवस्थाको आधार खडा गर्दै जानु अहिलेको महत्वपूर्ण र ऐतिहासिक आवश्यकता भएकाले सो पार्टी त्यागेर नेकपामा प्रवेश गरेको बताए ।
